“Zirə” Azərbaycan Premyer Liqasının XX turunda “Şamaxı”nı məğlub edib – 2:1.
Qış transfer dönəminin ən aktiv komandası olan “Şamaxı” fasilədən sonra ardıcıl ikinci oyunda xalsız qaldı. Meydan sahibləri görüşə daha istəkli başlayan tərəf idi. Erkən qol axtarışında olan “şirlər” ilk 15 dəqiqədə təhlükəli epizodlar yaradaraq, “Zirə” müdafiəsini ayıltdı. Fasiləyə yaxın hesabı da açmağı bacaran “Şamaxı” üstünlüyünü qoruya bilmədi. İlk hissənin sonunda və ikinci hissənin əvvəlində fərqlənən “Zirə” yekunda üç xalı qazanan tərəf oldu.
“Şamaxı” güclü rəqibinə yaxşı müqavimət göstərməyi bacardı. Xüsusilə ikinci hissədə bir neçə epizodu boşa verən “şirlər” son saniyələrdə bir xala yaxın olsa da, Arsen Ağcabəyov həyəcanına qalib gələ bilmədi.
Ardıcıl xal itkiləri “Şamaxı”nı autsayderlər qrupuna daha yaxınlaşdırır. Bu gün “Kəpəz” “Səbail”ə qalib gəlsə, 8 və 9-cu sıranın sahiblərinin xalları bərabər olacaq.
“Zirə” isə avrokuboklara vəsiqə yolunda mühüm qələbə qazandı. Ən yaxın izləyicisi “Turan Tovuz”un bu tur “Qarabağ”la çətin səfər görüşü var və xal itkisi gözləniləndir. Bu minvalda Şamaxıdan üç xalla qayıtmaq “Zirə”ni bir az daha irəli salmış olacaq.
