“Zirə” bu gün Konfrans Liqasının III təsnifat mərhələsinin ilk oyununda Xorvatiyanın “Osiyek” komandasının qonağı olacaq. Səfərdə baş tutacaq görüşə saat 22:00-da start veriləcək.
“Zirə” tarixində ilk dəfə Xorvatiya klubuna qarşı avrokubok oyununa çıxacaq. Ümumilikdə isə buna qədər Azərbaycan təmsilçiləri Avropa arenasında 4 dəfə xorvatlarla üz-üzə gəliblər.
“Xəzər Lənkəran” və “Neftçi” Çempionlar Liqasının seçmə mərhələsində hərəyə iki dəfə Zaqreb “Dinamo”su ilə qarşılaşıblar. Lənkəranlılar Azərbaycanda 1:1 hesablı heç-heçə edib. Cavab görüşündə isə Xorvatiya təmsilçisi 3:1 hesabıyla qələbə qazanıb.
“Neftçi” də “Xəzər Lənkəran” kimi eyni taleyi yaşayıb. Bakıda xorvatlarla “sülh” edən “ağ-qaralar” səfərdə 0:3 hesablı məğlubiyyətə üzülüb.
Beləliklə, hələ ki Azərbaycan təmsilçilərinin Xorvatiyada avrokubok oyunu qazanması olmayıb. Ümid edək ki, “Zirə” bu gün bu sindromu qıracaq.
Kamil Əhməd
