“Kəpəz”in futbolçusu İlkin Qırtımov klubun saytına açıqlama verib.
Futbolpress.az xəbər verir ki, hazırda zədəli olan oyunçu müalicəsinin davam etdiyini söyləyib:
“Müalicə, bərpa prosesi normal davam edir. Hər şey yaxşıdı. Davamlı müayinə olunuram. Şükür ki, ilk vaxtlar şiş olmadı. Əməliyyat uğurlu alınıb. Həkimlərin dediyi qaydada dizimi məşq etdirirəm. İnşallah, işlər arzuladığımız şəkildə gedər”.
Futbolçu onunla maraqlananlara, xüsusilə də azarkeşlərə təşəkkür edib:
“Ürəyi “Kəpəz” ilə döyünən bütün azarkeşlərimizə minnətdaram. İlk gündən dəstək verdilər. Onlar üçün dəyərli olduğumu hiss etdim. Komanda yoldaşlarım, klub rəhbərliyi də vəziyyətimi diqqətdə saxlayır, qayğı göstərir. Əlimdən gəldiyi qədər məşqlərə tez qoşulmağa çalışacağam ki, komandamın yanında olum. “Kəpəz”ə təcrübəmlə kömək edim”.
