Bu gün Azərbaycan Premyer Liqasında II dövrəyə start veriləcək. XIX turun açılış oyununda lider “Qarabağ” “Şamaxı”nı qəbul edəcək. Oyuna saat 19:00-da start veriləcək.
Azərbaycan millisinin sabiq baş məşqçisi Vaqif Sadıqov “FutbolPress“ə açıqlamasında görüşlə bağlı fikirlərini bildirdi:
“Çempionat həyəcanı yenidən başlayır. Hamımız maraqla gözləyirik. “Şamaxı” transfer dönəmini ən aktiv keçirən komandadır. Onların liderə qarşı necə oynayacağı maraqla gözlənilir. “Şamaxı” mövsümün sürpriz komandalarındandır”.
Mütəxəssis Juninyonun “Qarabağ”dan ayrılmasının komandaya təsiri haqda danışdı:
“Həmişə demişəm, “Qarabağ” bir oyunçuya bağlı deyil. Onlar sistem komandasıdır. Buna görə düşünürəm ki, onun təsiri hiss edilməyəcək. Çünki əvvəl də neçə oyunçuların getdiyini görmüşük. Amma “Qarabağ”ın bir sistemi var və boşluqlar doldurulur”.
“Şamaxı” dünən tanzaniyalı futbolçu Alfons Mbanqulanın transferini açıqlayıb. Premyer Liqaya tanzaniyalı oyunçunun gəlişi sosial mediada maraqla qarşılanıb. Sadıqov afrikalının keçidinə də toxundu:
“Premyer Liqamıza bundan öncə də nə qədər Asiyadan, Afrikadan oyunçular gəlib. Burda məsələ onun haralı olması deyil. Vacib olan komandaya uyğunlaşmaqdır. Uyğunlaşandan sonra da faydalı olan afrikalı legionerlər görmüşük. Bu baxımdan düşünürəm ki, Ayxan Abbasov da onun oyununu izləyib və bəyənib ki, komandaya gəlib”.
AFFA Məşqçilər Komitəsinin sədri olan Sadıqov son olaraq Premyer Liqa klublarının qış hazırlığının az olmasına münasibət bildirdi:
“Məşqçilər Komitəsi olaraq artıq Avropa standartlarına yavaş-yavaş keçmək haqda müzakirələrimiz olur. Bilirsiniz ki, Avropada da qış fasiləsi çox azdır. İndi bizdə də bu tətbiq olundu. Necə təsir edəcəyi maraqlıdır. Çünki komandalar qısa müddətdə çox da oyun ritmindən qopmurlar. Əvvəlki illərdəki uzunmüddətli fasilələrdə komandaların bir neçə oyuna toparlandığını görmüşük. Bundan başqa, bu mövsüm səhv etmirəmsə, birinci dəfə cəmi 1 komandamız Türkiyədə toplanış keçdi. Qalanları Azərbaycanda qaldı və hazırlıq belə keçdi. Bu toplanışın komandalara necə təsir edəcəyini maraqla gözləyirik”.
Şahin Cəfərov
