“Qarabağ” Avropa Liqasının Liqa mərhələsinin V turunda bu gün “Lion”u qəbul edəcək.
Tofiq Bəhramov adına Respublika stadionunda baş tutacaq görüşə saat 21:45-də start veriləcək.
Veteran futbolçu Yaşar Vahabzadə “FutbolPress“ə açıqlamasında matçdan gözləntilərini bölüşdü:
“Qarabağ”dan gözləntilərim böyükdür. Ötən turda Norveçdə qazanılan qələbənin davamını gətirməlidirlər. İnanıram ki, yaxşı nəticə olacaq. Düzdür, rəqibin Fransanın yaxşı komandalarındandır. Buna baxmayaraq, “Qarabağ” bu ölkə təmsilçilərinə qarşı oynayıb və təcrübəsi var. Pley-off şanslarını saxlamaq üçün qələbə qazanmalıdır. İnanıram ki, belə də olacaq”.
Mütəxəssis “Qarabağ”ın oyun zamanı diqqət etməli olduğu məqamları açıqladı:
“Müdafiədə diqqətli olmaq lazımdır. Hücumda olanda top itkilərinə yol vermək olmaz. Rəqibin təcrübəli oyunçuları var və əks-hücumlarda təhlükə yarada bilərlər. Bunun qarşısını almaq lazımdır. Hər bir halda, “Qarabağ” dominant oynamağa və qələbə qazanmağa çalışacaq”.
Şahin Cəfərov
