Azərbaycan millisinin baş məşqçisi Fernandu Santuşun mətbuat konfransı təşkil edilib.
Futbolpress.az xəbər verir ki, mütəxəssis jurnalistlərin suallarını cavablandırıb:
– Mehdi Cənnətovun heyətdə olmaması nə ilə bağlıdır?
– Texniki qərardır. Onunla şəxsi hansısa problemim yoxdur. Son oyunlardakı çıxışını bəyənmədim və başqa qapıçılara şans verməyi düşündüm.
– Mahir Emreli Estoniya ilə oyunda olmayacaq, Renat Dadaşov da zədəlidir. Hücumdakı problemi necə aradan qaldıracaqsınız?
– Həmişə çıxış yolu tapılmalıdır. Əlimizdə olan materiallardan istifadə edərək durumdan çıxmağa çalışacağıq. Bəzi oyunçular bu potensialdadır. Qarşıdakı məşqlərdə oyunçuları yoxlayacağıq və kimlərə şans verəcəyimizi biləcəyik.
– Millətlər Liqasında ciddi uğur mümkün deyil. Olmazdı ki, gələcəyə bağlı gənclərə üstünlük verəsiz?
– Biz də onu etməyə çalışırıq. Bu heyətin yaş ortalaması 25-dir. Daha iki gənc oyunçuya dəvət göndərmişik. Uşaqları sınaqdankeçirəcəyik və baxacağıq ki, hansılar bizə gələcəkdə kömək edə bilər. Əlbəttə, gənclərin yanında təcrübəli oyunçular da olmalıdır ki, inkişaf edə bilsinlər
– Arif Əsədovun gedişindən sonra demişdiz ki, yerli köməkçi məşqçi gətirəcəksiz. Ancaq bu təyinat baş tutmayıb. Hətta mediada yayılan xəbərlərə görə, Kamran Ağayevi də komandadan kənarda saxlayırsız…
– Xeyr, bu düzgün xəbər deyil. Sabah Kamran Ağayev bizimlə olacaq. Birinci suala gəldikdə, işlər gedir. Qarşıdakı toplanışlarda baxacağıq ki, hansı məşqçini korpusumuza daxil edə bilərik. Heç də asan deyil. Çox çətindir. Köməkçi işi elədir ki, baş məşqçiyə həqiqətən köməyi dəyməlidir. Bunun üzərində AFFA ilə bərabər işlər gedir.
– Qəbələ dağlıq ərazidir. Futbolçuların tənəffüslə bağlı problemləri ola bilər. Buranın iqlimindən xəbərdarsınız?
– Futbolçular hər şəraitə uyğunlaşmalıdır. Nəyisə bəhanə etmək olmaz. Çoxlu bəhanələr ola bilər – dağlıq ərazi, yağışlı hava və s. İstək olduğu zaman sadaladağım amillər ikinci planda qalır.
– “Araz-Naxçıvan”ın futbolçusu Mustafa Əhmədzadəni heyətə dəvət etmisiniz. Onda sizi cəlb edən nə oldu?
– Oyununu gördüm və məni cəlb etdi. İşimizin bir hissəsi də Premyer Liqa oyunlarına baxmaq, oyunçuları görməkdir. Mustafa həm mənim, həm digər məşqçilərin diqqətini cəlb etdi.
– Amin Seydiyev əvvəlki oyunlarda heyətdən kənarda qalmışdı. Ancaq indi onu milliyə dəvət etdiniz. Bu müddətdə Seydiyev inkişaf edib?
– Bundan iki toplanış öncə Seydiyevi çağırmışdım. Ondan sonrakı toplanışlarda millinin heyətinə cəlb olunmadı. Çünki həmin mövqedə başqa cinah oyunçularına şans vermək istədim. Qeyd etdiyim ki, oyunlara gedir, izləyirik. Bəzi oyunçuların çıxışı bizi cəlb edir. İndi də dəvət alması texniki qərardır. Əvvəl çağırılmaması o demək deyil ki, onunla şəxsi problemimiz var.
– Növbəti iki oyunda da məğlubiyyətlər olsa, bunu necə qarşılayacaqsız?
– Biz hər oyuna qələbə qazanmaq üçün çıxırıq. Əlimizdən gələni edəcəyik ki, qələbə qazanaq. Amma bir şeyi vurğulamaq lazımdır ki, yeni layihənin başlanğıcındayıq. İş gedir. Hamılıqla bərabər bunun üzərində çalışırıq. Heç nə bizi tutduğumuz yoldan geri çəkə bilməz.
Şahin Cəfərov
