“Neftçi”nin baş məşqçisi Füzuli Məmmədovun “FutbolPress”ə müsahibəsi...

- Qərarlar məlumdu, sizin şərhiniz necədi?

- Biz əvvəldən öz mövqeyimizi rəsmi şəkildə bəyan etmişik. Mən özüm də mətbuata əvvəl bildirmişəm ki, bəli, biz çempionatın davam etdirilməsinin tərəfdarıyıq, ancaq bu durumda yox. Məlumdu ki, həftənin iki günü qapanmalar olur və bu, komandanın hazırlaşmasına böyük maneədi. Həm də qorxurduq ki, futbolçularımız zədələnə bilər – artıq iki oyunçumuzla bağlı belə hal yaşandı. Mənə elə gəlir ki, futbolçular, futbol düşünülərək verilmiş düzgün qərardı. Artıq bizim həm avrokuboka hazırlaşmaq üçün vaxtımız var, həm də yeni mövsüm öncəsi də planlarımızı qura biləcəyik. Üstəlik, futbolçularımızı zədədən və xəstəlik təhlükəsindən qoruyuruq. Bütün bunlara görə düzgün qərar olduğunu hesab edirəm.

- “Neftçi”nin çempionluq şansı var idi, ancaq əzəli rəqibiniz "Qarabağ" qalib elan edildi...

- Əgər İcraiyyə Komitəsi belə qərar veribsə, buna riayət etməliyik. Əlbəttə, biz sona qədər mübarizə aparmağa hazır idik və aparacaqdıq da. Çempionluq uğrunda düyüşəcəkdik. Ancaq əgər belə qərar verilibsə, şərh edə bilmərik.

- Qərarı ədalətli hesab edirsiz?

- Hər halda, uzun müzakirələr aparılıb, bütün şərtlər nəzərə alınıb. Deməli, ədalətli qərardı.

- Avqustda Avropa Liqasında yeni mövsümə start veriləcək. Hazırlıq planları bəllidimi?

- Biz həm avrokubokun, həm də yeni mövsümün başlaması ilə bağlı dəqiq tarixləri bildikdən sonra planlı şəkildə hazırlaşacağıq. Məşqlərimizi bu günə qədər olan qaydada davam etdirəcəyik.

- Məşqlə oyun eyni olmadığı üçün yoxlama matçları keçirəcəksizmi?

- Əlbəttə, çalışacağıq ki, oyunlar çox olsun.

- Mövsüm davam etdiriləcəyi halda mümkün deyildi, ancaq indi ölkə xaricində toplanış variantı da var. Düzdü, sərhədlər bağlıdı, ancaq açılacağı təqdirdə, getməyi düşünəcəksiz?

- İndiki halda nəsə deyə bilmərik. Sərhədlər açılsa, getdiyimiz yer bizi qəbul etsə, ora başqa komandalar gəlsə, çalışacağıq ki, toplanış üçün gedək. Ancaq bu şərtlərin hər biri vacibdi. İmkan olsa, təbii ki, hazırlaşmaq üçün bu, daha yaxşı olardı. İndidən nəsə demək çətindi, vəziyyət göz qabağındadı.

- Heyətlə bağlı qərar vermək üçün mövsümün taleyinin necə olacağı gözlənilirdi. Gedənlər, qalanlar barədə ilkin fikirlər varmı?

- Çempionat barədə qərar bir qədər əvvəl verildi. Bu haqda hələ düşünəcəyik, müzakirələr aparacağıq. Hər şeyi götür-qoy etdikdən sonra qərar verəcəyik. İndi kimin gedəcəyi, kimin qalacağı barədə dəqiq nəsə deyə bilməyəcəm.