Bu gün:


FutbolPress.Az | "Qurban Qurbanov gəlib deməyəcək ki, oyunu verin" - Ayxan Abbasov

"Qurban Qurbanov gəlib deməyəcək ki, oyunu verin" - Ayxan Abbasov


oxunma sayı: 658 Paylaş:

FutbolPressAzərbaycan Premyer Liqasında 18-ci turun "Zirə" - "Qəbələ" (2:2) oyunundan sonra meydan sahiblərinin baş məşqçisi Ayxan Abbasov jurnalistlərin suallarını cavablandırıb.

O, əvvəlcə oyun barədə fikirlərini bildirib:

"Oyuna ciddi hazırlaşmışdıq. Bundan əvvəlki matçda məğlub olmuşduq. Buna görə də, ardıcıl ikinci məğlubiyyəti almaq istəmirdik. Üstəlik, evdə oynayırdıq. Məqsədimiz avrokuboklara vəsiqə əldə etməkdi. “Qəbələ” də güclü komandadı, son illər öz sözünü deməyi bacarır. Rəqib 10 nəfərlə qalsa da, qol vura bildi. Amma biz sonra iki hücumçuya keçdik və bərabərlik qolunu vurduq. İki futbolçu ilk dəfə idi ki, start heyətində yer alırdı. Onlar qarşıdakı görüşlərdə daha yaxşı olacaq. Çalışacağıq xallarımızın sayını artıraq".

- İctimaiyyətdə belə fikir formalaşıb ki, “Zirə” “Qarabağ”a bu cür sürətli oyun təklif etsəydi, xal ala bilərdi. Bununla razısızmı?
- İlk dəfə özümə borc bilirəm ki, buna cavab verim. Futbol oynayanda da bu tip hallar yaşanmışdı. Vaxtilə “Qarabağ” - AZAL matçında da eyni söz-söhbətlər yaranmışdı. Heç vaxt bu söhbətlərə getməmişik, məşqçi kimi də getməyəcəyik. Debüt etdiyimiz ötən mövsüm gümüş medal qazandıq. Paxıllıq yaranıb. Azərbaycan futbolunun problemi budu. Bizim sponsorumuz başqa, onlarınkı başqa. “Qarabağ” güclüdü və onlara qarşı oynamaq çətindi. Bu gün onlara rəqib yoxdu. “Qəbələ” də çempionluğa oynayır, amma “Qarabağ” tam fərqli oyun göstərir. Düzdü, “Qarabağ”da oynamışam. Amma Qurban Qurbanov gəlib deməyəcək ki, oyunu verin. Orda münasibətim yaxşı olan futbolçular var. Ötən mövsüm “Qəbələ”yə üç oyunçu vermişdik. O demək idi ki, onlara oyun verməliyik? Ən çox “Qarabağ”a qalib gəlmək istəyirəm. Onlarla oyunumuz alınmır, bizdən üstündülər.

- İlk 20-25 dəqiqədə hücumda çoxala bilmirdiz. Hesab 1:1 olarkən də eyni vəziyyət yaranmışdı...
- Biz hücumda ən azı 5 nəfərlə iştirak etmək istəyirdik. Amma cinah müdafiəçilərimiz hücuma az qoşulurdular. Bu da rəqibin təzyiqindən irəli gəlirdi. “Qəbələ” də qapımızda ciddi vəziyyət yarada bilmirdi. Amma ikinci hissədə daha baxımlı oynadıq. Bu həftə standart vəziyyətlər üzərində işləmişdik. Çünki “Qəbələ”nin bu baxımdan problemi olduğunu bilirdik. Qol buraxmağımız isə ani epizod oldu, müdafiəçinin ayağı sürüşdü. Ozobiç də çox yaxşı oyunçudu, bunu qaçırmadı.

- Sizə elə gəlmir ki, “Qarabağ”la oyundakı məqamlar söz-söhbətlərə zəmin yaradır? Komandanın bu rəqiblə matçda sarı vərəqə almaması, Elvin Məmmədovu əvəzləməyiniz müəyyən şübhələrə əsas verdi...
- Bununla razı deyiləm. Elvin Məmmədov “Qarabağ”la görüşü zəif keçirdi. Açığı, onu meydana buraxmaq istəmirdim. Amma özü çox oynamaq arzusunda idi. Üç gündən bir oynayırdı, yorulmuşdu. Əks-hücumdan oynamaq istəyirdik. Elvin Məmmədov birinci hissədə istədiyim kimi oynamadı. Üç hücumçu buraxmışdım. Uduzmaq istəsəydim, üç hücumçu ilə oynayardım? “Real” - “Barselona” oyununda da bəzən vərəqə olmur. Oyun belə gətirib, vərəqə verilmirsə, buna biz nə edək? “Qarabağ”ın ciddi qol vəziyyətləri olmurdu. Sadəcə, müdafiədən çıxa bilmirdik. Futbolçularımızda “Qarabağ”a, “Qəbələ”yə qarşı qorxu hissi var. Güclü legionerlər də Azərbaycanda bu komandanı tanıyırlar. “Zirə”ni yavaş-yavaş tanıyacaqlar. Çıxıb meydanda bu cür artistlik eləmərik.


oxunma sayı: 658 | Paylaş: