.png)
Rahid Əmirquliyev: "Meydana çıxıb-çıxmamağıma baş məşqçimiz qərar verəcək"
Paylaş:
| Paylaş:
.png)
"Qarabağ"ın yarımmüdafiəçisi Rahid Əmirquliyev artıq uzunmüddətli zədəsini tam sağaldaraq Avstriyada davam edən təlim-məşq toplanışında komanda ilə hazırlıqlarını davam etdirir.
Əmirquliyev klubun rəsmi saytına açıqlamasında zədəsinin son durumu, yarımmüdafiə xəttindəki rəqabətdən və Çempionlar Liqasındakı rəqiblərindən danışıb:
"6 aya yaxın yaşıl meydanlardan uzaq qaldım, amma indi durumum yaxşıdır. Komandayla məşqlərimi davam etdirirəm. Düzdür, yüz faiz hazır deyiləm, amma avrokuboklarda ilk oyuna qədər komandama tam gücümlə kömək etmək üçün çalışacam.
Komandaya yanvarda qoşuldum və cəmi 2-3 oyunda oynadım. Az oynamağıma baxmayaraq, daim onlarlar birlikdə olmuşam. Özümü yeni transfer kimi hiss etmirəm.
"Qarabağ"ın yarımmüdafiə xəttində necə bir rəqabətin olduğu hamıya məlumdur. Belə mübarizənin olması həm mənim, həm də bu mövqedə oynayan digər futbolçular üçün yaxşıdır. Əgər bir yer uğrunda mübarizə gedirsə, futbolçu öz üzərində daha çox işləyir. Belə rəqabətdən heç bir problem olmaz, əksinə qazanan futbolçular olacaq. Meydana çıxıb-çıxmamağıma isə baş məşqçimiz qərar verəcək.
Çempionlar Liqasında Lüksemburqun son mövsüm "qızıl dubl" edən "Düdelanj"ıyla qarşılaşacağıq. Rəqib haqda elə də ətraflı məlumatım yoxdur. Onların heyətində çox saylı legionerlər oynadığını bilirəm. Yəqin ki, bir neçə gün sonra rəqibi təhlil edəcəyik. Avrokuboklarda ilk oyunlar həmişə çətin olur. Qarşılaşmaya ciddi hazırlaşırıq, bilirik ki, bizim üçün heç nə asan olmayacaq. Əlimizdən gələni edəcəyik ki, növbəti mərhələyə vəsiqə qazanaq".
.jpg)
