Avropanın təcrübəli, tanınmış futbol funksionerlərindən biri, İsveç milli komandasının idman direktoru Yens Andersson “Neftçi” ilə müqavilə bağlayıb - klubun tәqdimatı belәdir. Ancaq Anderssonun portfoliosuna nәzәr yetirdikdә elә dә tanınmış saymaq olmur. Üç dönәm “AİK Solna” (2010-2013, 2014, 2018-2020) klubunda idman direktoru işlәyib. Bundan başqa, Xorvatiya ortabablarından olan "Hayduk"da cәmi bir il (2013) vә Danimarkanın "Orxus" klubunun idman direktoru olub (2014/16).

Aderssonun 2022-dә İsveç milli komandasının idman direktoru tәyin olunub vә orda da uzun müddәt işlәmәdәn Bakıya imza atmağa gәlib.

Ümumi mәnzәrәyә lakonik baxışdan dәrhal sonra belә bir sual әmәlә gәlir:

"Neftçi" Anderssonu hardan tapdı?

Hansı sәbәbә mәhz o?

İsveç yığmasının idman direktoru "Neftçi" üçün nә dәrәcәdә mühüm, dәqiq seçim sayıla bilәr?

İstәrdik bu seçimin hansı data vә mәntiqә söykəndiyini klub rәhbәrliyindәn eşidәk...

Rәhbәrlik demişkәn, Anderssonla müqavilә imzalanması barәdә geniş xәbәr mәtnindә hәmçinin belә bir cümlә var: "Qeyd etmək istərdik ki, klubda aparılan islahatlar davam edir və yeni, köklü dəyişiklər gözlənilir".

Yenә sual yaranır - "Neftçi"nin israrla dәyişilmәsi prosesi hansı ehtiyaca söykәnir? Vә yaxud proses nә vaxtadәk davam edәcәk?

Yenidәn "Neftçi"nin uğradığı qarışıq/dolaşıq vәziyyәtә lakonik bir baxış keçirәk.

Ötәn ilin dekabrında SOCAR-ın prezidenti Rövşәn Nәcәf "Neftçi"nin Müşahidә Şurasının sәdri oldu. Çingiz Abdullayevin müәmmalı/gizli gedişindәn sonra tam tәrkibdә yenilәnәn MŞ o vaxtdan toplaşmayıb. Düşünmәk olardı ki, iyulda Fәrrux Mahmudovun baş icraçı direktor postuna tәyinatı ilә nәhayәt, klubun re-strukturizasiya prosesi başa çatacaq. Lakin uzanır...

Strukturlaşma adlı mücәrrәd prosesin komandanın pis nәticәlәrinә "sığorta" kimi istifadә olunacağı ehtimalı isә günbәgün artmaqdadır.

Anderssonun tәyinatı o qәdәr tәmtәraqlı ifadә olunur ki, sanki Hans Kristien Andersenin nağıllarındayıq...

Zaur Әzizovun idman direktoru olduğu, Kamil Mәmmәdovun da bu işlәrә cәlb olunduğu bәs deyildimi, "Avropa sәviyyәli" direktor gәtirilir?

Әzizov "Qәbәlә"nin baş meneceri olanda klub iki dәfә avroliqanın qrup mәrhәlәsinә yüksәlib, akademiya ölkә üzrә әn mәhsuldar nәticәlәrlә yadda qalıb, әsas komandanın skautinq-seleksiya işlәrindәki uğurlar da göz önündәydi... Andersson burda qıçından icad uyduracaq?

Hәlә bu sadaladıqlarımız olmadan, "Neftçi" ölkәdә ilk dәfә avrokubok qrupuna adlayanda bunu "Avropa sәviyyәli" mütәxәssislә etmişdi? İdman direktoru, az qala hәrşey direktoru yerli Tahir Süleymanov idi. Bu, hәmin әrәfәlәr idi ki, "Avropa sәviyyәli" Toni Adams "Qәbәlә"nin çox böyük imkanlarına rәğmәn, nәinki qrup mәrhәlәsi, hətta pley-of sәddinәdәk irәlilәmәyin әlçatmaz olmasından bәhs edirdi...

"Qәbәlә" bacardı -  Adamssız, "Neftçi" bacardı - yerli kadrajla, "Qarabağ" bu işlәrin dastanını yazır - yerli kadrajla, "Sabah" inkişaf etmәkdәdir - yerli kadrajla.

"Neftçi" köhnәlmiş, etibarlılığı olmayan "Avropa sәviyyәli" janrında utopik cәhdlәrin fonunda pәrdәlәnmәmәlidir.

Mütәxәssislәr dә, tәcrübәli idman yazarları da, әksәr stajlı "Neftçi" fanları da yenidәnqurmanın doğru getmәdiyini yazır/deyir.

Görәk zamanla islahatlar hansı formada davam edir - "Avropa sәviyyәli" maskirovka ilә, yoxsa...

Elçin Cəlilov