Topaz Premyer Liqasında VIII turun “İnter” – “Neftçi” (0:2) oyunundan sonra təşkil olunan mətbuat konfransında meydan sahiblərinin baş məşqçisi Zaur Svanadze jurnalistlərin suallarını cavablandırdı.

O, əvvəlcə matç barədə fikirlərini bildirdi:

- Çalışdıq ki, nəticə əldə edək. Birinci qola qədər mübarizə apardıq. Samir Zərgərovun 3 qol imkanı oldu. İkinci hissədə də şanslardan yararlana bilmədik. “Neftçi” yaxşı komandadı. Nəticə ədalətli oldu. Heyətimizdə gənc oyunçular var idi. Nizami Hacıyev və İlkin Qırtımovun olmaması xüsusi çətinlik yaratdı. Növbəti oyuna hazırlaşmalıyıq. Yaxşı ki, qarşıda fasilə yaranacaq və Nizaminin sıraya qayıtması mümkün olacaq.

- Fikirləşmirsiz ki, bu gün “Neftçi” qələbəni daha çox istəyirdi?
- Bizim də arzumuz var idi. Amma əsas fərq ustalıqda idi. “Neftçi”nin futbolçuları yüksək səviyyədədilər. İstək hər iki komçandada eyni idi.

- “Neftçi” sanki meydan sahibi kimi görünürdü. Məğlubiyyəti azarkeş dəstəyi ilə də bağlamaq olarmı?
- Bunun da müəyyən təsiri ola bilər. Ancaq həlledici olduğunu demək olmaz. Bizdə adətən dəstək az olub, ancaq yaxşı nəticə qazana bilmişik. Azarkeşlərimizə təşəkkür edirəm ki, belə çətin vaxtda bizi tək qoymurlar.

- “İnter”in növbəti turdan başqa adla çıxış edəcəyi deyilir. Bu rədə məlumatınız varmi?
- Bu barədə bir şey bilmirəm.

- Aqşin Quluzadə son oyunlarda heyətdə görünmür. Bu, nə ilə bağlıdı?
- O yenə oynayacaq. Tez-tez heyətdə görəcəksiz. Sırf taktiki seçimizlə bağlı oynamır. Başqa səbəbi yoxdu.

- Ötən il qələbələr daha rahat əldə olunurdu. Heyətiniz və oyun üslubunuz dəyişməyib. Sizcə, komandalar “İnter”ə qarşı oynamağı öyrənib, ya komandada düşüş var?
- Düşünmürəm ki, eniş var. Ötən mövsümdən heyətimiz dəyişib. 3 mərkəz müdafiəçi ilə oynayırdıq, indi taktikanı dəyişmişik. Mövsümün əvvəlində də demişdim ki, transfer qadağası bizə çətinlik yaradacaq. Üstəlik bir neçə oyunçumuz gedib. Yanvara qədər ağır dövr keçəcəyik.

- Transfer qadağası sona yaxınlaşır. Kimisə heyətə cəlb etmək istəyirsizmi?
- Hələlik məlum deyil. Amma həm yerli, həm dəlegioner futbolçu almağı planlaşdırırıq.