"Qarabağ" Antalyada təlim-məşq toplanışını davam etdirir. Ağdam klubunun ispaniyalı yarımmüdafiəçisi Dani Kintana klubun rəsmi saytına müsahibə verib.

"FutbolPress" həmin müsahibəni təqdim edir:
 
- Təlim-məşq toplanışını necə dəyərləndirərdin?
- Hələ mövsümün başa çatmasına 3 ay var, biz də indi hazırlaşırıq ki, gələcək 3 ay üçün əlimizdən gələni edək və yaxşı nəticə əldə edək. Düzdür, fiziki hazırlıqlar çox və yorucu olur. Ancaq qızıl medalları qazanmaq istəyiriksə, bunu etməliyik.
 
- Qış fasiləsinə ikinci pillədə qərarlaşan "Qəbələ"dən cəmi 1 xal öndə yollandıq. Bu, futbolçularda təzyiq yaratmır?
- 1 xallıq fərq bizim üzərimizdə təzyiq yaratmır. Əsas məqsədimiz ardıcıl dördüncü dəfə çempion olmaqdır. Amma "Qəbələ"nin də çempionluq yarışında olması bizim üçün əlavə motivasiyadır.
 
- Ötən mövsüm daha çox qol vuran Kintana bu mövsüm məhsuldar ötürmələrlə yadda qalır. Komandada vəzifən dəyişməyib?
- Deməzdim ki, komandamda funksiyam dəyişib. Bu mövsüm bir neçə oyun meydanda olmadım, ona görə qol sayım az oldu. Çalışacam ki, mövsümün qalan hissəsində qol sayını artırım.
 
- Rəqib futbolçular oyunlarda sənə xüsusi olaraq diqqət ayırırlar və bunun nəticəsi kimi, sənə qarşı çox kobudluqlar olur..
- Əgər rəqib komandanın futbolçuları fikirləşirsə, ancaq məni saxlasalar, komandamızın qarşısını alarlar, bu rəqibin əleyhinə, bizimsə lehimizə olan bir şeydir. Çünki komandamızda yetəri qədər təhlükəli futbolçular var. Belə olduqda, digər futbolçularımız isə istədiklərini edir. Oyunlarda tez-tez mənə qarşı daha kobud oynayırlar, bu da hakimlərin işini çətinləşdirir. Son oyunda da bu hal istisna olmadı, ayağıma açıq zərbə aldım və tək istəyim həkimlərin meydana daxil olub tibbi müayinə göstərməsiydi. Həmin epizodda da sarı vərəqəylə cəzalandım, buna görə təəssüfləndim.
 
- Avropa Liqasında yarımmüdafiəçilər arasında ikili mübarizəda 15 cəhdlə ən çox qalib gələn ikinci futbolçu oldun. Bu barədə təəssüratların necədir?
- Belə bir statistika xoşdur, amma komandam əgər mərhələ adlaya bilmədisə, mənim üçün faydasızdır.