Azərbaycan Premyer Liqasının 2015/16 mövsümünün finişinə cəmi 5 tur qaldı. Gəlin turnir cədvəlinə baxaq: 31 turdan sonra 72 xal toplamış "Qarabağ" şəriksiz liderliyini davam etdirir. İkinci pillədəki "Zirə" 12 xal geridədir. Çempionatın debütantı son turda "Neftçi" səfərində xal itkisinə məruz qalmaqla aranın bir az da açılmasına səbəb oldu. Vә "İnter" 49 xalla üçlüyü qapayır. 

Diqqətçəkən məqam isə liderlər mövqeyindəkilərin bir-birinə xal məsafəsinin kifayət qədər böyük olmasıdır. Son illərdə belə hal müşahidə edilməmişdi. Çempionatda əksər iddialı klubların axsamasını buna əsas amil kimi gətirmək olar. Liderlə üçüncü yerdəki komandanın arasında 23 xallıq fərq çempionatda rəqabətin qızğın olmamasının əyani göstəricisidir. 

"Qarabağ"ın sabit çıxışına cavab verəcək rəqibin olmaması onun Avropadakı çıxışına da təsir göstərəcək. Ümumiyyətlə, bu il Azərbaycanı Avropada təmsil edəcək klubların yaxşı nəticə qazanmasına ümid bəsləmək çətindir. İkinci yerdəki "Zirə"nin texniki məsələlər, "İnter"in isə sanksiyalar səbəbindən qitəmiqyaslı turnirlərə qatılmayacağı demək olar ki, məlumdur. 
Bu yerlərə əsas namizədlər "Qəbələ", "Kəpəz", AZAL-dır. Həm də "Neftçi" qarşıdakı turlarda uğursuzluqları davam etdirməsə, bu sıradan birini sıxışdırıb, özü düşə bilər. "Ağ-qaralar" bu imkanı çempionatla yanaşı, ölkə kubokunda mübarizəni davam etdirməklə
 də əldə saxlayırlar.

Ancaq adıçəkilənlər içində heç birinin durumu normal deyil. AZAL-ın komandaya borcları bitmək bilmir, "Kəpəz"in heyətini gücləndirməsi şərt olsa da, bunu edib-etməyəcəyi böyük sual altındadır, uğur gətirən heyətin əsas oyunçuları icarəyə götürülüb, çıxıb gedə bilərlər və s. "Neftçi"də sistem bir-birinə o qədər qarışıb ki, komandada ab-havanı düzəltmək bir ildən çoxdur ki, mümkün olmur. Rəhbərliyin belə qısa müddətdə bunun öhdəsindən gələcəyi də inandırıcı deyil. "Qəbələ"yə gəlincə, orda da maddi rifah yerində deyil. Hətta komandanın gələn mövsümçün əsasən yerli futbolçulardan istifadə edəcəyi, büdcəni azaldacağı kimi söhbətlər gəzir.