Cəzalar və çıxılmaz vəziyyət (QEYD)
Paylaş:
Topaz Premyer Liqasında idarəçilik eləyən hakimlərdən üçü cəzalıdır. Onlardan ikisi FIFA dərəcəli hakimdir - Əliyar Ağayev və Orxan Məmmədov.
Məmmədov mövsümün ilk yarısında - son turun "Sumqayıt" - "Rəvan" görüşündən bu yana təyinat almır. Komitə sədri Xaqani Məmmədov açıqlamışdı ki, ona verilən cəza qeyri-müəyyən müddətədir. Bu əlahəzrət qeyri-müəyyən müddət anlayışına aydınlıq gətirilməsinə lap çoxdan ehtiyac var...
Əliyar Ağayevlə cəzalı digər referi Fariz Yusifov isə müvafiq olaraq, son dəfə XIX turun "Neftçi" - "Sumqayıt" və "Kəpəz" - "Qəbələ" matçlarını idarə edib.
Ölkənin ən perspektivli hakimi sayılan Ağayevin 3 turluq cəzalandırıldığı məlumdur.
Bu cəzalar səbəbindən TPL-də hakim təyinatı üçün defisit hiss edilir. Hakimlər Komitəsi ardıcıl ikinci turdur ki, eyni referilərə təyinat verir.
Cəzasız olan yeganə FIFA referisi Rəhim Həsənov "Neftçi" - "Xəzər Lənkəran" matçını idarə edəcək. Həsənov son turda "İnter" - "Qəbələ" matçına təyinat almışdı. Bunu nəzərə alsaq, onun psixoloji, fiziki və digər komponentlərdə yorğunluğu keyfiyyətli idarəçiliyə təsirsiz ötüşməyəcək.
"Kəpəz" - "Qarabağ" qarşılaşmasını təyinat alan Ömər Paşayev ötən həftə "Sumqayıt" - "Zirə" maçtının baş hakimi idi. XX tur "Neftçi" - "Rəvan" oyununun baş hakimi olan Elvin Əsgərov da bu dəfə AZAL - "İnter" matçını idarə edəcək. XX turda "Qarabağ" - "Xəzər Lənkəran" oyununda meydana çıxan İnqilab Məmmədov "Zirə"nin "Rəvan"la ev oyununda ədalətçün məsuliyyət daşıyacaq. Rəvan Həmzəzadə isə ötən tur "Kəpəz" - AZAL qarşılaşmasına təyinat almışdı, bu dəfə isə "Qəbələ" - "Sumqayıt" matçında olacaq.
Gördüyünüz kimi, ardıcıl iki tur eyni hakimlərə təyinatlar var və bu amil onların performansına mütləq təsir göstərəcək.
Belədə sual yaranır: HK-nın hakim sıraları niyə bu qədər qısadır və illərlə davam edən bu tendensiyada irəliləyişin olmamasına səbəb nədir?
Elçin Cəlilov
| Paylaş: